ہفتہ 31 اکتوبر , 2020

ٹرمپ اور میلانیا کورونا وائرس سے متاثر

امریکی صدر ڈونلڈ ٹرمپ اور ان کی اہلیہ میلانیا ٹرمپ کے کورونا وائرس سے متاثر ہونے کی تصدیق کردی گئی ہے، دونوں نے خود کو قرنطینہ کرکے تمام مصروفیات منسوخ کر دی ہیں۔

ڈونلڈ ٹرمپ کی مشیر ہوپ ہکس میں وائرس کی تشخیص کے بعد اب صدر اور خاتون اول کا ٹیسٹ مثبت آیا ہے، ہوپ نے صدر کے ساتھ ایک ہفتہ پہلے طیارے میں سفر کیا تھا۔ ڈونلڈ ٹرمپ نے بھی ٹوئٹ کرکے اہلیہ سمیت کورونا سے متاثر ہونے کی تصدیق کردی ہے۔

صدر ٹرمپ نے انٹرویو میں بتایا کہ وہ اور میلانیا ہوپ کے ساتھ بہت زیادہ ملتے رہے ہیں۔ امریکی میڈیا کے مطابق منی سوٹا سے واپسی پر ہوپ ہکس میں کورونا علامات ظاہر ہوئی تھیں۔

میلانیا ٹرمپ نے بھی ٹوئٹ کیا ہے اور بتایا کہ وہ کورونا ٹیسٹ مثبت آنے پر ڈونلڈ ٹرمپ کے ساتھ قرنطینہ ہوگئی ہیں، دونوں کی صحت بہتر ہے۔

وائٹ ہاوس سے جاری بیان کے مطابق 74 برس کے صدر ٹرمپ اور میلانیا کی طبیعت اس وقت بہتر ہے، ذرائع کے مطابق اگر صدر ٹرمپ کی طبیعت زیادہ خراب ہوتی ہے تو نائب صدر مائیک پینس عارضی طور پر اختیارات سنبھال سکتے ہیں۔

امریکا میں صدارتی الیکشن 3 نومبر کو ہورہے ہیں ، اس اہم وقت پر صدر کی طبیعت خراب ہونے اور مصروفیات منسوخ کئے جانے سے ری پبلکن ارکان تشویش میں مبتلا ہیں۔

صدر ٹرمپ ، میلانیا اور ہوپ ہکس سے پہلے وائٹ ہاوس کے کئی عہدیدار کورونا وائرس سے متاثر ہوچکے ہیں ، اسی لئے امریکی صدر کی رہائش گاہ میں روزانہ کی بنیاد پر کورونا ٹیسٹ کئے جارہے ہیں۔

ٹرینڈنگ

یہ بھی پڑھیں

مینو